塔利班重奪阿富汗控制權後，成為咗全球焦點所在。外界一直擔心塔利班捲土重來會唔會令阿富汗成為各個恐怖主義組織嘅大本營。不過，恐怖主義組織「伊斯蘭國」就公開宣佈，批評塔利班係叛徒同「不良穆斯林」，仲聲稱可能會响阿富汗進行「聖戰」。而塔利班亦講明唔會允許「伊斯蘭國」响阿富汗存在。

塔利班同「伊斯蘭國」俾外界感覺兩者都係伊斯蘭遜尼派，又奉行原教旨主義同主張政教合一，所以可能係同一陣線。但按以往同今次「伊斯蘭國」嘅「批評」，兩者似係水火不容多啲。响2001年塔利班政權被推翻後，先後多個恐怖主義組織抬頭，其中一個就係「伊斯蘭國」。「伊斯蘭國」乘伊拉克同叙利亞局勢混亂，於是於2014年响伊拉克同叙利亞兩國領土上建立政權，勢力擴展至東非、南亞以至中亞等地，仲同唔少極端組織結盟，好似尼日利亞武裝組織博科聖地就歸順咗「伊斯蘭國」。由於塔利班拒絕歸順「伊斯蘭國」，响2015年响阿富汗境內嘅「伊斯蘭國」武裝份子就搶佔原屬塔利班嘅地區，仲活捉塔利班武裝分子同將其斬首，最終雙方正式宣布開戰，過去幾年都有發生雙方衝突嘅事件。所以塔利班重奪阿富汗控制權後，「伊斯蘭國」動向將成為其中一個關注焦點。

原圖：chinaso.com